واش الحبس فيه غير المجرمين

اليوم اخواني غادي نحيد الفكاهة ونخلي النقد الساخر.

كنت كندوش وانا نتفكر واحد الواقعة وقعات ليا في الثانوي.وقررت نقتسمها معاكم عل وعسى تكون لينا حافز باش نتعلمو نgولو لا للظلم لا للمحسوبية لا ولا ولا ولا ولا .........

في سنة 1982 كنت انا وشي طلبة مكسلين قدام ثانوية عقبة بن نافع بالحي المحمدي كنتسناو الصونيط ديال الاستراحة ,جا عندنا واحد السيد كيبان عليه التعب والارهاق ولكن مازال صحيح كيطلب صدقة .متسوقناهش وهو بقا كياكد حتى طلع لينا في الراس .درنا فيه gلنا ليه سير تخدم ونتا باقي صح من ظالم . جبد لينا واحد الورقة فيها التاريخ ديال البارح ديال السجن وgال لينا راني يلاه خارج من الحبس .ومع الطيش ديال الشباب ديالنا بدينا كنسولو فيه ياكما درتو لمن اليد الفوقانية لشي بنت الدوار ههههههههههههه اولا طرت بشي قفز ديال الحمام ههههههه.بدا كيعاود لينا وصدمنا ."كان عمرو 16 عام ملي جا للدار البيضاء كيقلب على الخدمة اسبوع وهوا كيسدي في الزناقي .معندوش فين يبات .كيمشي لواحد الجردة كينعس فيها.واحد النهار وقفو عليه صحاب الحال طلبو منو لاكارط اولا الكارني ديال البصلانة ههههههههههههه.ما عندوش تكاو عليه وداوه دوز داك اشي لي قسم ليه الله في الكابينة ديال الكوميسارية .واحد النهار تفكروه بدلو ليه حوايجو وقدموه لقاضي التحقيق بتهمة القتل .وحيت ماسول فيه حد ماعندو موحامي حكمو عليه 18 سنة نافدة .دوز منها 13 سنة وجاه العفو ."

تحياتي الحقوقية